Fréttir - heilsueflandi skóli

Heilsueflandi skóli/Grænn skóli - Vellíðan

Á haustönn 2018 verður unnið með þemað ,,vellíðan”. Verkefni tengd vellíðan verða á ýmsan máta tengd inn í leikadaglegt skólastarf og meðal annars unnin á íþróttadegi, í hringekjum og á fullveldishátíð skólans 30. nóvember.
Markmið þemans vellíðan er að veita nemendum og starfsfólki skólans innsýn í hvað vellíðan er og af hverju vellíðan skiptir okkur öll máli.
Sjá nánar

Íþróttadagur

Þann 5. september var íþróttadagur hjá okkur í grunnskóladeild Ártúnsskóla. Dagurinn hófst á setningu verkefnisins ,,Göngum í skólann" sem allir höfðu gaman af að taka þátt í. Frá kl. 10 tók svo við íþróttahringekja þar sem nemendur fóru á milli stöðva í aldursblönduðum hópum. Verkefnin voru fjölbreytt og skemmtileg og veðrið lék við okkur. Meðal verkefna voru m.a. hlaupahjólaþraut, boltaæfingar, þrautabraut, kubbspil, dans, Dr. Bike kom í heimsókn og fór yfir hjól og hjólareglur með nemendum og við leituðum bangsa í náttúrunni. Á íþróttadegi reynir á samvinnu nemenda og eldri nemendur eru einstaklega lagnir við að aðstoða yngri nemendur skólans í gegnum verkefnin. Annars tala myndirnar sínu máli. 

Setning á Göngum í skólann verkefninu

Það var einkar skemmtilegur dagur í Ártúnsskóla í dag. Við vorum svo heppin að verkefnið ,,Göngum í skólann" var sett af stað í skólanum okkar þetta árið og margir góðir gestir komu í heimsókn af því tilefni. Í framhaldi af setningunni var svo íþróttadagur hjá okkur þar sem nemendur fóru í gegnum íþróttaþrautir í aldurs blönduðum hópum. 

Meginmarkmið Göngum í skólann er að hvetja nemendur og foreldra á Íslandi til að ganga, hjóla eða nota annan virkan ferðamáta til og frá skóla, hvetja til aukinnar hreyfingar og fræða börn um ávinning reglulegrar hreyfingar. 

Á meðan að á átaksverkefninu stendur ætlum við að auka útiveru og hreyfingu allra bekkja og eins ætla bekkirnir að keppa að gullskónum. En hann fæst með því að ganga sem oftast í skólann. Þeir sem búa langt frá skólanum geta tekið þátt með því að fá far upp að Árbæjarsafni og ganga þaðan. 

Göngum í skólann verkefnið fer fram fram á Íslandi í septembermánuði og því lýkur á Alþjóðlega Göngum í skólann deginum þann 10. október.

Nánari upplýsingar má sjá á vef Íþrótta- og ólympíusambands Íslands. 

 

Fleiri myndir má sjá hér. 

Íþróttadagur

Á miðvikudaginn nk, þann 5. september er íþróttadagur í grunnskóladeild Ártúnsskóla. Í upphafi skóladags verður verkefnið “Göngum í skólann” formlega sett. Klukkan 10:00 hefst íþróttahringekja. Hringekjan samanstendur af níu íþróttastöðvum þar sem meðal annars verður boðið upp á hlaupahjólabraut, samvinnuleiki og dans. Íþróttadagurinn verður að þessu sinni tengdur þemanu „Vellíðan“. Mikilvægt er að okkur líði öllum vel í skólanum, umgöngumst hvort annað af virðingu og ræktum sem best bæði líkama og sál.

Við erum mikið úti þennan dag og því þurfa allir að vera klæddir eftir veðri. Þá eru allir hvattir til þess að koma í skólapeysum þennan dag. Á einni stöðinni þurfum við að nota hjólahjálma, því hvetjum við alla til að mæta með buff til að forðast lúsasmit ef að eitthvað slíkt leynist í einhverjum kolli.

Íþróttadagur er skertur skóladagur og kl. 12:40 fara nemendur í 4. - 7. bekk heim. Nemendur í 1. - 3. bekk fara allir í Skólasel sem og þeir nemendur í 4. bekk sem þar eru á skrá. Nemendur í 1. - 3. bekk sem ekki eiga vistun í Skólaseli fara heim skv. stundaskrá.