Minna plast

Margt áhugavert hefur verið gert í umhverfismálum nú á haustdögum. Stjórn FUÁ gekk í alla bekki og hvatti alla til að taka virkan þátt í ,,Plastlausum september“ með því að hvetja til umræðu um plastmengun og að nota eingöngu fjölnota nestibox. Árgangar skólans eru að vinna skemmtileg verkefni sem tengjast plasti og umhverfisfræðslu sem gaman verður að fylgjast með. Nemendur og starfsfólk Ártúnsskóla sameinuðust í árvekniverkefni og hreinsuðu rusl í hverfinu. Ruslið var flokkað í plast og almennt rusl og því safnað saman í fötur á skólaóðinni. Sjá má á myndunum að ruslið er ekki eins mikið og vænta mætti. Eftir tiltektina var safnast saman hjá afrakstrinum (ruslahrúgunni) og sungið saman ,,Sing for the climate, do it now“. Verkefnið var unnið í tengslum við Erasmus verkefni sem skólinn er þátttakandi í ,,Ecoroad“ í samstarfi við skóla (Í Englandi, Belgíu og Finnlandi). Afraksturinn fáið þið svo að sjá í myndbandi þann 11.11. 2017.

Umhverfisdagar í Ártúnsskóla

Allir dagar eru umhverfisdagar í Ártúnsskóla og í septembermánuði fara allir hópar Ártúnsskóla í grenndarskóg að hlúa að og njóta birkitrjánna í afmælislundi Ártúnsskóla. Nemendur tengja hófsemi í náttúrunni við listræna sköpun í tengslum við birkitrén. Geta má þess að við vorum svo heppin að tveir starfsmenn frá Útmörk hafa verið að saga og grisja tré meðfram göngustíg í grenndarskógi. Svo nú höfum við eldivið fyrir útieldun og trékubba til listsköpunar fyrir skólann.

Hófsemi

Á haustönn 2017 vinnum við með gildið “HÓFSEMI”. Verkefni tengd hófsemi verða fléttuð inn í daglegt skólastarf og meðal annars unnin á íþróttadag, umhverfisdag og í hringekjum.

Markmið er fyrst og fremst að kynna hófsemi fyrir nemendum og þýðingu þess fyrir einstaklinga, samfélagið og heiminn allan. Temjum okkur hugsunina að allt sé best í hófi – andstæðan við græðgi og ofgnótt. Hér áður fyrr var allt nýtt eins og kostur er, m.a. stoppað í sokka, en í dag er viðhorfið víða annað, margt er einnota, við hendum og kaupum nýtt. Meiri upplýsingar má nálgast hér

Fleiri greinar...